Réckruffaktioun vum Prius: 57 Autoen zu Lëtzebuerg betraff
RTL - 09.02.2010, 12:38 - Fir d'lescht aktualiséiert: 12.02.2010, 19:14
Alleng um amerikanesche Marché si ronn 100.000 Prius-Ween vun der drëtter Generatioun betraff. Weltwäit solle 437.00 Autoen zréckgeruff ginn. Zu Lëtzbuerg sinn also am ganzen 57 Autoe betraff.
Den Autoskonstrukteur Toyota schéngt vum Pech verfollegt ze sinn: no enger grousser Réckruffaktioun weltwäit bei verschiddene Modellen, wéint der Gaspedall ass et elo de Contraire: et hu sech Clients iwwer d'Bremse beim Hybrid-Auto Prius, beschwéiert.
Et géif mat Momenter een Decallage ginn, tëscht dem Drécke vun der Brems an dem reelle Bremsen. Dat wier bedéngt duerch ee Problem an der Software vum ABS Programm, mä dat ass awer näischt wouriwwer ee sech misst Suerge maachen, huet de Chef vun Toyota Lëtzebuerg, Jean-Louis Rigaux erklärt.
Hei zu Lëtzebuerg si 57 Prius vun där Réckruffaktioun betraff, d'Leit ginn entweder per Bréif oder Telefon kontaktéiert.
Et ass kloer datt d'Cliente sech vill Froe stellen an den "Image" Schued fir d'Marque grouss ass. Dobäi, esou de Jean-Louis Rigaux, komme Réckruffaktiounen och ëmmer nees bei aneren Autosmarke vir.
An de leschte Woche schonn hat Toyota Millioune vun Autoen zréckgeruff. A verschiddenen Autoe wor d'Gaspedall hänke bliwwe respektiv den Teppech ënnert d'Pedall gerutscht.
No Toyota ass elo Honda un der Rei
De japaneschen Autoskonstrukteur huet annoncéiert weltwäit iwwer 430.000 Autoe mussen zréckzeruffe wéinst engem Problem mam Airbag. Betraff sinn d'Modeller déi 2001 an 2002 gebaut goufen. Iwwer 380.000 Autoe goufen an den USA verkaf, ee groussen Deel och a Kanada an de Rescht uechter d'Welt. Ënner anerem den Honda Civic, an Accord si concernéiert. Bei verschiddene Modeller kann duerch deen héijen Drock den Airbag platzen an d'Passagéier am Auto blesséieren.
VIDEO: De Reportage op RTL Télé Lëtzebuerg vum Frank Goetz
