Saab: Spyker keeft schwedeschen Autosproduzent fir 400 Mio €

Reprise vu Saab: De Mammekonzern General Motors huet en Dënschdegowend bekannt gemaach, datt den hollännesche Sportswonkonstrukteur Spyker Saab iwwerhëlt.

Spyker hat Uganks Januar eng verbessert Offer fir eng Reprise op den Dësch geluecht.

400 Milliounen Dollar hunn d'Hollänner sech de Spaass kaschte gelooss, fir Saab ze iwwerhuelen. 74 Millioune musse boer op den Dësch geluecht ginn; de Rescht kritt GM a Form vu Prioritéitsaktien. Den Deal soll Mëtt Februar ofgeschloss sinn.

Déi schwedesch Regierung steet elo Bierg fir e Kredit vu 400 Milliounen, dee Saab bei der europäescher Investitiounsbank agereecht huet.

D'Aktie vu Spyker goung um Dag nom Deal ëm bal 50 Prozent an d'Lut, op 6 Euro d'Stéck.

De Vizepresident vun GM John Smith huet vun enger gudder Nouvelle geschwat, fir déi Beschäftegt vu Saab, d'Händler d'Zouliwwerer an déi Millioune Saab-Fans weltwäit.

Zu Trollhättan a Schwede freeën se sech, allerdéngs ass et alles aneschters wéi garantéiert, datt net awer mussen Aarbechtsplazen ofgeschafe ginn.

Saab beschäftegt den Ament nach 3.400 Leit a Schweden. Wann den Autoskonzern seng Dieren zougemaach hätt, hätt dat de Verloscht vu ronn 8.000 Aarbechtsplaze bedeit.

Zanter Januar 2009 hat General Motors een Interessent fir seng schwedesch Duechtergesellschaft gesicht.

Nieft Spyker wor och déi Lëtzebuerger Investmentfirma Genii Kapital vum Gerard Lopez zesumme mam Formel-1 Chef Bernie Ecclestone un enger Reprise interesséiert. Si haten hir Offer awer virun zwee Deeg zréckgezunn.