De V40 ass op den éischte Bléck direkt als Volvo z’erkennen. Spezialiste vun der Mark entdecken esouguer, wéi hannen Elementer vum legendäre P1800 zitéiert ginn. Och den Intérieur entsprécht der schwedescher Design-Philosophie: sober, edel an op de Chauffer ausgeriicht. Bei de Sécherheetséquipementer huet Volvo d’Lat nach emol méi héich geluecht. De V40 huet als éischten Auto e Foussgänger-Airbag, donieft goufen déi aktiv Assistenzsystemer (CitySafety asw.) massiv weiderentwéckelt.

Mam R-Design-Package trimmt Volvo seng Modeller op Sport fir esou eng méi jonk Clientèle ze erreechen. Zënter kuerzem ass och de V40 als R-Design ze kréien. Virun allem d’Optik suggeréiert Sport, méi Leeschtung kritt een awer net. Op Wonsch ass ëmmerhin e Sportfuerwierk ze kréien.

De CrossCountry ass e V40, deen op Offroader mécht. D’Rezept ass bekannt: déck Parechoce mat Aluminiumsprotectiounen suerge fir déi néideg ToutTerrain-Optik, donieft ass d’Karosserie héich geluecht. 4cm sëtzen d’Passagéier hei méi héich iwwert der Strooss. Allrad gëtt nëmme fir den décke Bensinner T5 ugebueden.

Fir eng ganz Partie Modeller ass en neien Diesel disponibel. Den D3 huet 2 Liter op 5 Zylinder verdeelt a bréngt 136 Päerd. E ka mat enger manueller 6-Gang-Boîte oder mat der Geartronic kombinéiert ginn. Den alen D3 mat 163 Päerd gëtt iwweregens onverännert bäibehalen. E gouf nëmmen an D4 ëmgedeeft.